წიგნში თავმოყრილია ყველა ის საკითხი, რაც უცხოური ენის შესწავლასა და სწავლებას უკავშირდება და მისი გამოყენება შესაძლებელია როგორც საგანმანათლებლო სივრცეში, ასევე მის გარეთ ნებისმიერი დაინტერესებული პირისათვის. უცხოური ენების სწავლების საფუძვლების მიზანია, უცხოური ენის სწავლების მნიშვნელოვანი საკითხების მიმოხილვითი ხასიათის ინფორმაციების მკითხველისათვის მიწოდება და ამით, უპირველეს ყოვლისა, უცხოური ენების მოქმედი და მომავალი მასწავლებლების დახმარება; მათ წინაშე არსებული პრობლემების გადაჭრა; განათლების სისტემაში მიმდინარე რეფორმების ხელშეწყობა და ა.შ. წიგნი შედგება ორი ნაწილისაგან. პირველი ნაწილი ეთმობა •უცხოური ენების ათვისებისა და სწავლების თეორიებს; •უცხოური ენების მეთოდების განვითარების ისტორიას; •სამეტყველო უნარ-ჩვევებისა და ენის სისტემის ასპექტების სწავლების პრობლემებს; •საკუთარი და შესასწავლი ქვეყნის/ქვეყნების კულტურათა დიალოგს ენის დაუფლებისას; •შეფასების პრობლემებსა და ტესტირებას უცხო ენის სწავლა/სწავლებისას და სხვა ისეთ მნიშვნელოვან საკითხებს, რომელთა გარეშეც სასწავლო პროცესი სრულყოფილი სახით დღეს წარმოუდგენელია. წიგნის მეორე ნაწილი მთლიანად ეთმობა საქართველოში უცხოური ენების სწავლა/სწავლებას.