სოც.რეალიზმი ალბათ ერთ-ერთი იმ იშვიათ ლიტერატურულ ტენდენციათაგანია, რომელიც ყველაზე მეტად აახლოებს ქართულ ლიტერატურას გერმანულენოვან ლიტერატურასთან, რადგან 1945-1990 წწ. როგორც ქართული, ისე აღმოსავლეთ გერმანული (ე.ი. გერმანიის დემოკრატიული რესპუბლიკის) ლიტერატურა კოლონიური სინამდვილის ფარგლებში იწერებოდა. ლექციაზე აღმოვაჩენთ, რომ გერმანიის დემოკრატიულ რესპუბლიკაში შექმნილი ლიტერატურა სულაც არ ყოფილა ისეთი ერთფეროვანი, როგორც წარმოგვედგინა; ჩვენ შევიტყობთ, რის შესახებ წერდა „მწერალ მუშათა წრეები“ და რა არის „აღმშენებლობითი რომანი“; გავარკვევთ, რატომ მოიპოვება დღემდე ყველა ქართულ ბიბლიოთეკაში ერვინ შტრიტმატერის, ვილი ბრედელის, ანა ზეგერსის, ჰერმან კანტისა და სხვათა ნაწარმოებები; დავაკვირდებით, როგორ შეიცვალა აღმოსავლეთ გერმანული ლიტერატურის თემატიკა 60-იან წლებში, როდესაც მწერალთა ახალი თაობის კრიტიკული დამოკიდებულება ცხოვრების სოციალისტური წესის მიმართ აშკარა გახდა; გავიცნობთ მწერალ ქალს (ქრისტა ვოლფს), რომელმაც მოახერხა, თანაბრად ცნობილი გამხდარიყო ორივე გერმანიაში; დავფიქრდებით, რატომ წერდა უვე იონსონი იდენტობადაკარგულ ადამიანებზე და რატომ იქცა ფოლკერ ბრაუნისთვის სოციალიზმი უშინაარსო მეტაფორად.